„ეკონომიკური პრობლემების კვლევის ცენტრის“ ხელმძღვანელი ჩვენთან საუბარში აცხადებს, რომ 10%–იანი ზრდა მხოლოდ გარედან სტიმულირებით არის შესაძლებელი. დავით ნარმანიას თქმით, ქვეყნის შიდა რესურსი მკვეთრი ზრდისთვის საკმარისი არ არის.

მისი განცხადებით, 2010-2011 წლებში 7-პროცენტიანი მატება საგარეო ვალების და საინვესტიციო პროექტების ფონზე დაფიქსირდა. თბილისის სახელმწიფო უნივერსიტეტის პროფესორის ემზარ ჯგერენაიას განცხადებით, მთლიანი შიდა პროდუქტის 10%–იანი ზრდა ქვეყანაში  2012-2015 წლებში უცხოური  ინვესტიციების მინიმუმ   2 მილიარდი დოლარით გაზრდის პირობებშია შესაძლებელი.

მისივე თქმით, ეკონომიკურ ზრდას ექსპორტის მკვეთრი მატებაც გამოიწვევს, რაც ამერიკასა  და ევროპასთან თავისუფალ ვაჭრობის ხელშეკრულებით არის შესაძლებელი.  ექსპერტი 2012-2022 წლებში ეკონომიკის ყოველწლიურად 10%–იან  ზრდას  რეალურად მიიჩნევს. ჯგერენაიას განცხადებით, ადგილობრივ ბაზარზე მასშტაბური ენერგეტიკული ინვესტიციები უკვე დაგეგმილია, ხოლო  ევროპასთან თავისუფალი ვაჭრობის ხელშეკრულების გაფორმება წლის ბოლომდე დასრულდება.